أسطورة النهاردة معقدة ومتشعبة شوية لأن موضوعها مُقبض ومرتبط بأساطير تانية.. النهاردة هنحكي قصة الملكة والربّة الإغريقية إينو Ino..
إينو هي الزوجة الثانية لأثاماس Athamas ملك مقاطعة أرخومينوس Orchomenos، إينو وأثاماس كانوا عايشين حياة سعيدة هادية مع أولادهم الاتنين. مشكلة إينو الوحيدة كانت أبناء أثاماس من زوجته الأولى نيفيلي Nephele، واللي مش عارف مين نيفيلي فهي حورية مخلوقة من السحاب أثاماس تزوجها وخلف منها ولد وبنت آية في الجمال، فلكم أن تتخيلوا غيرة إينو منها. ده غير أن إينو كانت عايزة تتخلص من أبناء نيفيلي اللي كانت حاسة بالتهديد من ناحيتهم طول الوقت.. فعملت إيه بقى؟
إينو بوظت كل محصول المملكة في السر لدرجة أن الناس افتكرت أن دي لعنة من الآلهة حلت على مملكتهم، فأثاماس بعت رُسله للعرافة علشان يعرفوا هم هببوا إيه وممكن يكسبوا ود الآلهة تاني إزاي. إينو بقى أخدت الرُسل على جنب ورشتهم وقالت لهم خدوا الفلوس دي وروحوا اقعدوا على القهوة اشربوا حجرين واعملوا نفسكم روحتوا للعرافة ولما ترجعوا قولوا لأثاماس إن العرافة طلبت التضحية بابنه من نيفيلي. الرُسل فعلاً عملوا زي ما إينو قالت لهم بالحرف وأثاماس آسفًا مُتألمًا لقى نفسه مضطر يضحى بابنه علشان شعبه يأكل.
المهم قبل بدء طقوس التضحية بدقائق، نيفيلي بعتت كبش ذهبي بأجنحة أخد أولادها الاتنين وطار بيهم بعيدًا، ولكن للأسف خلال رحلتهم البنت بصت لتحت فداخت ووقعت من على ضهر الكبش في البحر وماتت. الولد فضل عايش وراح بالكبش على مملكة كولخيس Colchis وهناك ضحى بالكبش الذهبي اللي فروه هيبقى المحرك الرئيسي لقصة البطل جايسون Jason ورحلته الأرجونية الشهيرة.
نرجع بقى لإينو اللي المفروض كده الجو راق ليها ولأولادها، ولكن هيهات.. بعد التخلص من أولاد أثاماس من نيفيلي، إينو لقت مصيبة تانية هبطت على دماغها.
لو تفتكروا قبل كده لما حكينا قصة ولادة إله الخمر والعربدة ديونيسيوس Dionysus وقولنا إن أمه البشرية سيميلي Semele اتحرقت وهو لسه في بطنها لما زيوس Zeus تجسد أمامها بعد ما عمل عملته وإن زيوس أنقذه وبعته عند ناس يربوه بعيدًا عن أعين زوجته الحيزبونة هيرا Hera. أهو الناس اللي زيوس بعت الرضيع ديونيسيوس عندهم دول هما إينو وأثاماس، ليه؟ علشان إينو تبقى أخت المرحومة سيميلي.. الأساطير الإغريقية أوضة وصالة.
وجود ديونيسيوس مع إينو وأثاماس كان مصيبة لسببين: السبب الأول هو انتقام هيرا اللي عاجلاً أم آجلاً هتعرف بوجود ديونيسيوس معاهم وهتعوز تتخلص منه وتسوّد عيشتهم، والسبب الثاني هو أن وجود ديونيسيوس نفسه خطر لأن ديونيسيوس زي ما احنا عارفين هو إله الخمر والمجون ومجرد تواجده في مكان بيدفع كل اللي حواليه للتخلي عن عقلهم والتصرف بجنون.
المهم بعد ما ديونيسيوس بيكبر شوية، وفي يوم من الأيام، إينو بتصحى من النوم بكل هدوء وبتروح تجيب ابنها الكبير من سريره وتحطه في قدر فيه مياه مغلية وبتقعد تتفرج عليه وهو بيتسلق! وبعدها جابت ابنها الثاني وأخدته ونطت بيه في المياه وماتوا.
فيه رواية تانية بتقول إن أثاماس هو اللي اتجنن وقتل ابنهم الكبير وهو بيصطاد، فإينو علشان تهرب منه أخدت ابنها الثاني ونطت بيه في المياه وماتوا برضه.
سواء اللي حصل ده حصل بسبب انتقام هيرا أو بسبب وجود ديونيسيوس فأعتقد معظم الناس هتتفق أن إينو لاقت عقابها الإلهي المناسب بسبب تآمرها على أولاد نيفيلي ومحاولة التخلص منهم، فالنتيجة كانت أنها شربت من نفس الكأس وفقدت أولادها هي كمان.
بس قبل ما نتسرع ونقفز للحُكم ده، محتاجين نحط القصة في إطار أوسع شوية..
فاكرين لما اتكلمنا قبل كده عن عقد هارمونيا the necklace of Harmonia؟ وقولنا إن العقد الملعون ده عمله إله النار والحدادة هيفايستوس Hephaestus للانتقام من خيانة أفروديت Aphrodite له. هيفايستوس أهدى العقد لابنة أفروديت هرومونيا Harmonia وهارومنيا أهدته لابنتها وابنتها أهدته لحفيدتها وهكذا.. العقد زي ما قولنا كان ملعون ومجرد تواجده مع شخص ما أو في أسرة ما بيؤدي لهلاك الأسرة دي أو نزول المصائب عليها بشكل أو بآخر. هارمونيا أول ما أخدت العقد اتجننت ودفعت زوجها لهلاكه وهي اتحولت لثعبان وحاجة أحلام نومة العصر خالص..
المفاجأة بقى أن إينو هي ابنة هارمونيا واللي ورثت منها العقد هي وأخواتها.
سيميلي، أخت إينو وابنة هارمونيا برضه، زي ما قولنا من شوية لاقت مصير مهبب واتحرقت بعد ما حملت من زيوس. أجاڤ Agave أختهم التالتة أتجننت وقطعت ابنها حتت. وإينو زي ما شوفنا سلقت ابنها وأخدت التاني وانتحرت.
وهنا لازم نسأل نفسنا هل اللي عملت له إينو واللي حصل لها بعد كده كان نتاج لتفكيرها الشرير الإجرامي ولا قدرها بسبب توارثها لعقد هارمونيا؟ ولا الاتنين؟
اتكلمنا قبل كده عن رمزية عقد هارمونيا وإزاي أنه بيمثل مفهوم الخطيئة المتوارثة اللي هنلاقيه في الأديان والأساطير والأعراف المجتمعية، وساعتها هيبقى مصير إينو مُقدر له أن يحدث وهندرك أن إينو بتلعب دور في مسرحية نهايتها معروفة.
بس لو بصينا للجانب النفسي للموضوع هنلاقي صعوبة في تصنيف سلوك إينو ككقدر أو إرادة حرة. السؤال اللي تبادر لذهني وأنا بقرأ الأسطورة كان هل محاولة إينو لإيذاء أبناء نيفيلي سببه شر متأصل في نفسها ولا محاولة غير واعية لإيذاء نفسها وتخريب حياتها.. نوع من الـ self-sabotage يعني؟ السؤال ده فكرني شوية بمصير ميديا Medea وإزاي أن قتلها لأولادها من جايسون كان انتقام من نفسها على ضعفها قبل ما يكون انتقام من جايسون نفسه. قد تكون رغبة إينو لتخريب حياتها هي عقد هارومنيا اللي ورثته من أمها وجدتها، الإحساس بأنها لا تستحق أي سعادة وأن أي شيء جيد في حياتها مصيره الخراب والهلاك، ولو الخراب ده ماحصلش يبقى هي هتتسبب فيه حدوثه بشكل غير واعي. إينو كانت عايشة في سعادة مع أثاماس بس قررت أنها تتغاضى عن الحياة الهانئة دي وماتشوفش قدامها إلا أولاد نيفيلي اللي غالبًا، بالنسبة لها، هيكونوا السبب في تبدد سعادتها. وهنا ممكن نشوف إينو كنقيض لبطل القصة “ثلاث شعرات ذهبيات من رأس الشيطان” اللي حكيناها المرة اللي فاتت واللي كان إيمانه بحظه وسعادته هو السبب في نجاته.. على عكس إينو اللي إيمانها بتعاستها هو السبب في هلاكها.
فيه ناس كتير عقلهم بيبقى مُبرمج على تجاهل مصادر السعادة أو الجوانب الإيجابية في حياتهم والتركيز مع أي شيء قد يسبب تعاسة محتملة ورؤيته على أنه مصدر للخطر، والنتيجة أنهم بيضيعوا على نفسهم فرص حياتية للسعادة، سواء مهنيًا أو عاطفيًا أو غيره، بسبب أنهم قاعدين في أبعد ركن في حياتهم متأهبين وماسكين مسدس في إيديهم لدرء الخطر اللي غالبًا بيبقى موجود في دماغهم بس. نفسيًا، السبب في السلوك ده بيبقى تعرض الشخص لصدمة كبيرة ما خلته يشوف كل حاجة حواليه كمصدر محتمل للأذى وأحيانًا دماغه بتدفعه أن يرد الأذى ده بأذى من قبل ما يحصل أصلاً. ممكن يكون السبب فيه كمان أسلوب التربية القائم على الخوف والترهيب واللي بتؤدي أن الطفل بيكبر معندهوش ذرة ثقة في نفسه ولا في المحيطين بيه وبيبقى عايش حياته في حالة رعب وتأهب دائمين.. فالطفل بيعيش حياته كلها وهو لابس عقد هارمونيا وشايل ذنب لم يرتكبه بأن حياته دي مصيرها الهلاك ولو ماحصلش يبقى هيتسبب فيه بنفسه بشكل غير واعي.
في الدراسات الأدبية لعلم النفس فيه مصطلح اسمه transgenerational trauma أو الصدمة العابرة للأجيال، المصطلح بيعبر عن الصدمات اللي بتتوارثها الأجيال من بعض. الفكرة بتقول أن الأهل مهما حاولوا يربوا أولادهم تربية سليمة برضه الصدمات اللي اتعرض لها الأهل هتنتقل للأطفال بشكل ما زي انتقال عقد هارمونيا الملعون من جيل لآخر، وأن كل جيل بيشيل صدمات وآثام الجيل اللي قبله زي ما أولاد وأحفاد أفروديت فضلوا يتحملوا عواقب خيانتها لهيفايستوس.
مش بحاول أبرر لإينو فعلتها المهببة ومحاولتها للتخلص من أولاد نيفيلي، بس السؤال اللي بيدور في دماغي هو لأي حد كانت مدركة أن سلوكها ده نوع من أنواع إيذاء النفس؟ وأن الشر الموجه للآخرين ده هو في النهاية شر موجه لنفسها ولحياتها؟
في النهاية، الأسطورة بتقول لنا إن إينو لما نطت في البحر هي وابنها وماتوا اتحولوا لآلهة. إينو من وقتها أصبحت الربّة البيضاء ليكوثيا Leucothea اللي البحارة بيتباركوا بيها وبيلجأوا لمساعدتها وهم تايهين في البحر. موضوع التأليه Apotheosis ده، أو رفع بشري لمنزلة الآلهة، بيُعتبر نوع من التكريم وهنلاقيه بيحصل في الأساطير الإغريقية للأبطال وأصحاب التضحيات النبيلة زي هرقل Heracles وسايكي Psyche وغيرهم. ليه بقى يحصل لواحدة حاولت تقتل أبناء زوجها وبعدها قتلت أولادها ونفسها؟
قد يكون ده مكافأة على تربيتها لديونيسيوس.. أو إشارة واضحة لإدراك الآلهة بأن إينو ضحية عقد هارمونيا الملعون.
مش المطلوب مننا نكون آلهة ونشوف مين لافف عقد هارمونيا على رقبته ومين مش لابسه، بس القصة بتورينا أن غالبًا كل واحد من اللي حوالينا طول الوقت شايل أشباح أثقاله وأثقال من سبقوه، فلو مش هنقدر نشوف ده أو نخفف عنه.. على الأقل مانكونش حمل آخر فوق ضهره.
دمتم بلا أحمال.. وبلا أشباح.
صندوق لابانشي 