كأس لايكرجوس Lycurgus Cup هو أحد مقتنيات المتحف البريطاني المهمة. الكأس يعود للقرن الرابع الميلادي ومصنوع بطريقة تخليه يبان لونه أخضر بس مع تغيير زاوية الإضاءة بيتحول للون الأحمر.
الكأس بيصور أسطورة من الميثولوجيا الإغريقية اللي بتحكي عن لايكرجوس، ملك من ملوك منطقة تراقيا Thrace في اليونان. لايكرجوس لما عرف بقدوم ديونيسيوس Dionysus إله الخمر والعربدة وأتباعه لمملتكه قرر أنه يجري وراهم ويطردهم شر طردة لأن أتباع ديونيسيوس كان معروف عنهم الانحلال والمجون. بس ده طبعًا أغضب ديونيسيوس لأن اللي كان بيعمله أتباعه بيتشاف كنوع من الطقوس المقدسة، وبالتالي طردهم من المملكة يُعتبر تعدي سافر على الآلهة. ديونيسيوس أنتقم من لايكرجوس بأنه أصابه بالجنون لدرجة أن اعتدى على أمه وقتل مراته، ده غير أنه شاف ابنه على شكل نبات لبلاب (النبات المقدس عند أتباع ديونيسيوس) فافتكر أن ديونيسيوس زرع له النبات في بيته علشان يغيظه، فحرق النبات وقطعه حتت صغيرة غير مدرك أنه بيعمل كده في ابنه. في النهاية لايكرجوس تهيأ له أن أطرافه اتحولت لنبات اللبلاب فمسك سكينة وقطع رجليه ومات.
الجميل في الكأس هو موضوع تحول اللون ده اللي بتخليه يعكس تحول لايكرجوس من العقل (الأخضر) للجنون المطلق (الأحمر). الكأس من الداخل بقى فيه درجة فاتحة من اللون الأحمر وكأن لايكرجوس كانت بداخله طوال الوقت بذرة الجنون اللي قدر ديونيسيوس يرويها ويكبرها ويخليها تسيطر على حياة لايكرجوس.
وقد تكون دي طريقة ديونيسيوس للانتقام علشان يوري لايكرجوس أن المجون اللي هو رفضه في الأول جزء دفين في نفس كل إنسان بما فيهم هو شخصيًا.
صندوق لابانشي 